Psa 63 | KYG | STEP | O Gotiyo, hu'na, Goti'nimogamo mai'nane. Kagesuvafe'mo kotilamisiyapi'mo kahauya huguve. Naune'name'mo'a kagaefe'mo nehaiye. Ani'mo ohane'niya kote'mo mai'ne'nae'mo vaya'mogimo anife'mo nehapaiya kava huno kagaefe'mo ne'nahaiye.

Psalms 63

Gotifeke'mo ne'nahaiye, huno hu'niya gemae

1 O Gotiyo, hu'na, Goti'nimogamo mai'nane. Kagesuvafe'mo kotilamisiyapi'mo kahauya huguve. Naune'name'mo'a kagaefe'mo nehaiye. Ani'mo ohane'niya kote'mo mai'ne'nae'mo vaya'mogimo anife'mo nehapaiya kava huno kagaefe'mo ne'nahaiye. 2 Hogote'na kaote mono nokafi'mo mai'ne'na lokiyaka'e ha le konali yaka'e'mo age'nova kava hu'na hemeni'e'mo agesuvafe'mo huve. 3 Ofali'na afa'a ne'mauva kava'mo kanale kava'mo hane'niya'monanafa o'nataleka kahau kayamopafi'mo kahau'nigeka naha ne'mana kava'mo aeno agase'niya kava'mo hane'niya'mofe'mo kagikale'mo ali'na asaga hu'na kategauve. 4 Muki afina'mo afa'a mai'ne'nae'mo kahao ke hege hege hu'na maiguve. Naya'mo ali'na asaga huli'ne'nae'mo kagaefeke'mo nunumu huguve. 5 Afumo afaya'a'e atu'a'e'mo ne'a apamu nehaya kava huno nagupi mafa'nemo'a neno amu hugiye. Nagaemo namogaga aite'na navayafati'mo yokemo hu'na kagikale'mo ali'na asaga hu'na kategauve.

6 Hipa'nile'mo havaegefe'mo nehu'nae'mo kagaefeke'mo nagesamo afite'na muki hani'ilaga'amo kagaefeke'mo nagesa afifi nehuve. 7 Naha mae'nana'mofe'mo kahakufi'mo mai'ne'nae'mo namogaga aiguve. 8 Nagupi mafa'nemo'a magokepi lokaeno maisiyafe'mo kakame nehigeka nayapi'mo natafauka alika lokiya vaika ne'natane.

9 Nehana'monanafa kahauya hu'a nage'a nahaegefe'mo nehaya vaya'mo mopamo afepilaga fali'naya vaya'mo lami'a ne'maiya kotegamo lamigae. 10 Kame vaya'apimogi hapaesage'a afela kalamogi apakufa'amo negae. 11 Negaya'monanafa kini vekamo'a Gotife'mo amogaga aigiye. Agi'alefe'mo ani kava'mo nehaya vaya'mogimo ha le konali ya'apimo aligaya'monanafa aigofe gemo nehaya vaya'ai apavayale'mo alino akanigiye.